ҚР ПІБ Медициналық орталығының ауруханасы мен «Қазақстандық спортшылар одағы» РҚБ ынтымақтастық туралы Меморандумға қол қойды.
Меморандумның мақсаты қазақстандық спортшылардың денсаулығы мен оны қайта қалпына келтіруге көмек көрсету, қолдау. Тараптар ҚР ПІБ МО ауруханасының Спорттық медицина орталығының жұмысы аясында Спортшылар одағы мүшелеріне консультациялық-диагностикалық және хирургиялық қызметтер көрсету туралы уағдаласты.
«Меморандум біздің серіктестігімізді одан әрі берік ете түспек. Бұл ретте, қол жеткізілген ынтымақтастықтың негізгі тармақтарына тоқталып өткім келеді: мамандандырылған медициналық қызмет көрсету, әр пациентке жеке жағдай жасау, жарақаттарды емдеу және алдын алу, сондай-ақ спорттық әлеуетті оңтайландыру», - деді ҚР ПІБ МО ауруханасының Спорттық медицина орталығының басшысы Асқар Баймұхаметов.
Өз кезегінде Қазақстандық спортшылар одағының төрағасы Азамат Қарлығашев, меморандум аясында қазір спортта жүргендермен қатар өз мансабын аяқтаған спортшыларға да емдік шаралар ұсынылатынына Аурухана басшылығына алғысын білдірді.
Бұл мәселенің өзектілігін «Қазақстандық спортшылар одағы» төралқасының төрағасы,Олимпиада чемпионы Серік Сәпиев те атап өтті. «Мен өз мансабының шыңына жеткенде спортты тастап кетуге мәжбүр болған көптеген спортшыларды жеке танимын. Сондықтан да отандық спортшылар үшін осындай мүмкіндік туғанына мен өте қуаныштымын. Енді кәсіби спортшыларымыз жарақаттардың салдары үшін қорықпай, сапалы медициналық көмек ала отырып, спортпен шұғылдануды жалғастыра алады деп үміттенемін», деді өз сөзінде халықаралық спорт шебері, боксшы Серік Сәпиев.
ҚР ПІБ МО ауруханасында жыл басынан бері спортшыларды қабылдап, ойын барысында алған түрлі жарақатын емдеп, ота жасап, келесі додаларға дейін сауықтыратын Спорттық медицина орталығы жұмыс істейді. Жыл басынан бері орталықта 200-ден астам травматологиялық операция жасалғанын атап өткен жөн.
