ҚР ПІБ МО ауруханасында ҚР ПІБ Медициналық орталығының басшысы Алексей Цой Таиланд сыртқы істер министрінің орынбасарының кеңесшісі Расс Джаличандра мырзамен кездесті.
Аталған іс-шараға ҚР ПІБ МО ауруханасының басшылығы мен медицина қызметкерлері, сондай-ақ Таиланд делегациясының өкілдері қатысты.
Кездесу аясында денсаулық сақтау саласындағы әріптестікті одан әрі дамытуға баса назар аудара отырып, Қазақстан мен Таиланд арасындағы ынтымақтастықты нығайту мәселелері қозғалды.
Келіссөз соңында шетелдік қонақтар үшін ауруханаға экскурсия ұйымдастырылды. Экскурсия шеңберінде делегация қалпына келтіру емі және оңалту орталығымен, клиникалық-фармакологиялық бөлімімен және аурухананың басқа бөлімшелерімен танысты.
