29 мамыр күні ҚР Президенті Іс басқармасы Медициналық орталығының басшысы Алексей Цой мен Батыс Қазақстан облысының әкімі Нариман Төреғалиев өзара ынтымақтастық туралы меморандумға қол қойды.
Келісім «Қазақстан Республикасы Президенті Іс басқармасы Медициналық орталығының күндері» шеңберінде іске асырылды.
Мақсаты - өңір тұрғындарына дәрігерлердің кеңесін, санаторий-курорттық емдеу және медициналық оңалту қызметтерін алуға мүмкіндік беру.
Сондай-ақ, екіжақты құжаттың нәтижесінде өңірдің медициналық мекемелерінің қызметкерлерін инновациялық технологияларға оқыту, аурулардың алдын алу, диагностика, емдеу және оңалту саласында тәжірибе алмасу туралы уағдаластыққа қол жеткізілетін болады.
ҚР ПІБ Медициналық орталығының басшысы Алексей Цой Батыс Қазақстан облысының әкіміне ынтымақтастық үшін алғысын білдіріп, Орал қаласында болған 2 күн ішінде делегация мүшелері 400-ден астам шеберлік сағаттар мен консультациялар өткізіп, 30 операция жасады, оның ішінде бірегейі - 9, 342 қатысушыны қамтитын 10 дәріс, 183 тыңдаушыны қамтитын 11 семинар мен тренинг ұйымдастырғанын атап өтті.
«Ұлт денсаулығын нығайту табысты мемлекеттің маңызды міндеттерінің бірі. Мемлекет басшысы Қасым-Жомарт Кемелұлы Тоқаев денсаулық сақтауды дамытудың басты бағытын айқындады - бұл әрбір қазақстандық үшін озық технологиялар мен әлемдік стандарттардың деңгейінде сапалы медициналық қамтудың қолжетімділігі. Ағымдағы жылы Мемлекет басшысының тапсырмаларын және Қазақстан Республикасы Президенті Іс басқармасы Медициналық орталығын дамыту тұжырымдамасын іске асыру шеңберінде Қазақстанның барлық өңірлерінде “Медициналық орталықтың күндері" өтуде. Бүгін біз Батыс Қазақстан облысының әкімдігімен ынтымақтастық туралы меморандумға қол қойдық. Бұл тиімді диалогты дамытудағы және серіктестікті нығайтудағы маңызды кезең екеніне сенімдімін. Бұл біздің азаматтарымыздың денсаулығы үшін әлеуетті көрсету, ғылыми-практикалық байланыстардың көкжиегін кеңейту мүмкіндігі»,- деп бөлісті А. Цой.
Өз кезегінде, Батыс Қазақстан облысының әкімі Нариман Төреғалиев облыс тұрғындарына сапалы медициналық көмек көрсеткені үшін ҚР ПІБ Медициналық орталығына алғысын білдірді.
«Президент Қасым-Жомарт Кемелұлы Тоқаев Қазақстан халқына Жолдауында «Еліміздің басты құндылығы – адам. Ұлт саулығы жақсы болса, қоғам орнықты дамиды» деп атап өткен болатын. Елордалық жоғары тәжірибелі мамандарының науқас жандарға жасаған оталары мен ем шаралары, медициналық қауымдастығымызға берген дәріс, кеңестері денсаулық сақтау саласының одан әрі дамуына серпін беретініне сенімдемін», - деді Н. Төреғалиев.
Естеріңізге сала кетейік, 27-30 мамыр аралығында ҚР ПІБ Медициналық орталығы жүйесінің жетекші дәрігерлері мен мамандары өңір тұрғындарына медициналық көмек көрсетіп және күрделі операциялар жүргізіп, Орал қаласындағы әріптестеріне шеберлік сыныптарын өткізуде.
Диагностика және операция бойынша жедел жұмыс жалғасуда.
