Алматыда, Almaty Resort шипажайының базасында санаторий-курорттық салаға цифрлық технологияларды енгізуге арналған «Жасанды интеллект. Шипажайлардың болашағы» атты Қазақстандағы алғашқы конференция өтті. Іс-шараның ұйымдастырушысы – Қазақстан Республикасы Президенті Іс басқармасы Медициналық орталығының «Оқжетпес» шипажайы.
Сессия реабилитологтарды, IT-әзірлеушілерді және шипажай өкілдерін бір алаңға біріктірді. Қатысушылар цифрлық трансформацияның қазіргі жағдайын және медициналық оңалту мен курорттық мекемелерді басқаруда жасанды интеллектіні қолданудың мүмкіндіктерін талқылады.
Almaty Resort өзінің цифрландыру жобаларын таныстырды. Олардың қатарында қызмет көрсету аймақтарында қолданылатын AlmaBot робот-официанты бар. Шипажай мәліметінше, ол қызметкерлердің жүктемесін азайтуға және қонақтарға көрсетілетін қызмет сапасын арттыруға көмектеседі.
16 жастағы Үкілі Омарова жасаған Soile AI жобасы қатысушылардың ерекше қызығушылығын тудырды. Қосымша инсульттан кейінгі сөйлеу бұзылыстары бар адамдардың, ДЦП және логопедиялық қиындықтары бар адамдардың сөйлеуін мәтін мен аудиоға айналдырып береді. Конференция барысында жобаны тәжірибе жүзінде қолдану мысалдары көрсетілді, атап айтқанда ДЦП диагнозы бар баланың сөзін түсінікті етіп, мәтінге айналдырды.
Almaty Resort реабилитологы Александр Шин мұндай жобалар пациенттермен коммуникацияны арттырып, медициналық құжаттарды рәсімдеуді жеделдетуге мүмкіндік беретінін атап өтті.
Сарапшылардың айтуынша, жасанды интеллект мамандарды алмастыру үшін емес, оларды қолдау құралы ретінде қарастырылады. Клиникалық баға, дәрігердің бақылауы және пациентке жеке көзқарас — негізгі қағидат болып қала береді.
