ҚР ПІБ МО ауруханасында Siemens Artis Icono floor жүйесімен жабдықталған ангиографиялық технологиялардың референс-орталығы өз жұмысын бастады.
Орталықтың салтанатты ашылуы мен лентасын қию рәсімін ҚР ПІБ МО басшысы Рустам Албаев пен Siemens Healthineers вице-президенті Соня Визель өткізді.
Іс-шараға ҚР ПІБ МОА директоры Раушан Қарабаева, Германияның Қазақстандағы Төтенше және Өкілетті елшісі Моника Иверсен, Австрияның Төтенше және Өкілетті елшісі Андреа Бахер, сондай-ақ Siemens Healthineers компаниясының өкілдері қатысты.
Сөз сөйлеушілер бірлескен жобаларды дамыту заманауи интервенциялық технологияларды енгізуге және елдегі клиникалық тәжірибені кеңейтуге елеулі үлес қосатынын атап өтті.
Іс-шара барысында референс-орталықтың жұмысы таныстырылды. Рентгенхирургия бөлімінің меңгерушісі Александр Землянский Artis Icono floor жүйесінің негізгі мүмкіндіктерін көрсетті. Оның айтуынша, бұл кешен кардиоинтервенциялар, нейроинтервенциялық процедуралар және қантамырлық араласуларға арналған бағдарламалық пакеттермен жабдықталған. Мұндай мүмкіндіктер түрлі аз инвазиялы операцияларды бірыңғай технологиялық ортада жүргізуге жағдай жасайды.
Жүйе бірнеше бағдарламалық ассистентпен жабдықталған. Олардың қатарында коронарлық қан ағымын инвазиясыз бағалауға арналған VFFR технологиясы бар. Бұл функция қосымша инвазиялы араласусыз қантамыр зақымдануының дәрежесін нақты анықтауға мүмкіндік береді. Аталған жабдық радиациялық жүктемені азайта отырып, визуализацияның жоғары сапасын қамтамасыз етеді.
Ангиограф аурухананың цифрлық ПАКС жүйесімен интеграцияланған. Бұл КТ, МРТ және басқа визуализация әдістерінің деректерін араласу барысында навигацияның дәлдігін арттыру үшін пайдалануға мүмкіндік береді. Осындай интеграция клиникалық ақпараттылықты арттырып, дәрігерлердің шешім қабылдау үдерісін жеделдетеді.
Айта кетейік, референс-орталықтың ашылуы заманауи технологияларды енгізуге, медициналық мамандардың біліктілігін арттыруға және пациенттердің жоғары технологиялық көмекке қолжетімділігін кеңейтуге қолайлы жағдай жасайды. Жаңа орталық интервенциялық медицинаны дамыту мен клиникалық инфрақұрылымды жаңғыртудың маңызды құрамдас бөлігі болып табылады.
