«Қарлығаш» балабақшасында қызылша ауруының өршуі жағдайында тәрбиеленушілердің денсаулығын қорғауға бағытталған профилактикалық шаралардың кеңейтілген кешені енгізілді. Жұмыс санитариялық-эпидемиологиялық талаптарға сәйкес ұйымдастырылып, инфекцияның таралуының алдын алуға бағытталған.
Қабылданған шаралар күн сайынғы таңертеңгілік фильтрді, балалардың жалпы жағдайын бағалауды, тұрақты медициналық бақылауды және санитариялық-гигиеналық режимді күшейтуді қамтиды. Сонымен қатар үй-жайларды жүйелі түрде желдету мен дезинфекциялық құралдарды қолдана отырып ылғалды тазалау жүргізіледі. Профилактикалық екпелер күнтізбесінің сақталуына бақылау жасалып, ата-аналармен өзара іс-қимыл және түсіндіру жұмыстары қамтамасыз етіледі.
Профилактикалық шараларды күшейту елдегі жалпы эпидемиологиялық жағдайға байланысты. Мамандардың мәліметінше, Қазақстанда күн сайын орта есеппен 20–25 жаңа жағдай тіркеліп, 2025 жылдың соңына қарай ауру жұқтырғандар саны 3 мыңнан асты. Сарапшылар бұл жағдайды вакцинация деңгейінің төмендеуімен байланыстырады.
Қызылша – жұқпалылығы өте жоғары вирустық ауру. Ол ауа-тамшылы жолмен беріледі және балалар ұжымдарында тез таралады, асқыну қаупі жоғары.
Медициналық мамандар профилактиканың негізі Қазақстан Республикасының ұлттық екпелер күнтізбесіне сәйкес жүргізілетін вакцинация екенін атап өтеді. Қызылшаға, қызамыққа және эпидемиялық паротитке қарсы вакцина 12 айлық жаста салынып, 6 жаста қайта егіледі. Эпидемиологиялық жағдай күрделенген кезде медициналық көрсеткіштер бойынша 9 айлық жастан бастап, ал жағдай тұрақталғанға дейін 6 айлық жастан қосымша вакцинация жүргізіледі (ҚР Бас мемлекеттік санитарлық дәрігерінің 2023 жылғы 1 қарашадағы №7 қаулысы).
Баланың денсаулығына жауапкершілікпен қарау, дәрігерге уақтылы жүгіну және медициналық ұсынымдарды сақтау қауіпсіздікті қамтамасыз етудің негізгі шарттары болып қала береді.
