Қазақстан Республикасы Президенті Іс басқармасының Медициналық орталығында кеңейтілген алқа отырысы барысында 2025 жылғы қызмет қорытындылары шығарылып, орта мерзімді кезеңге арналған стратегиялық даму басымдықтары айқындалды.
Отырысқа ҚР Президенті Іс басқарушысының орынбасары Бақыт Әбілдинов, ҚР ПІБ Медициналық орталығының басшысы Рустам Албаев, сондай-ақ ведомстволық қарасты ұйымдардың басшылары мен мамандары қатысты.
Жұмыс қорытындысын шығара отырып, Бақыт Әбілдинов 2025 жылғы негізгі жетістіктерді атап өтіп, 2026 жылға арналған басым міндеттерді белгіледі. Есепті жылы Медициналық орталық қызметінің 95 жылдығы аталып өтті. Негізгі бағыттар – жаңа медициналық технологияларды енгізу, клиникалық зерттеулер жүргізу және бейінді шетелдік клиникалармен ынтымақтастықты дамыту болды.
Медициналық орталықтың басшысы Рустам Албаев 2025 жылы бірқатар жаңа әдістемелер енгізілгенін, олардың бір бөлігі Қазақстанда алғаш рет қолданылғанын атап өтті. Бұл медициналық қызмет түрлерін кеңейтуге және халықаралық әріптестермен өзара іс-қимылды нығайтуға мүмкіндік берді.
Жыл қорытындысы бойынша жүргізілген операциялар саны 3,5%-ға артып, 15,6 мыңнан асты. Емханалық қызметтің тиімді жұмысының арқасында орталық жүйесі бойынша жалпы сырқаттанушылық 3,2%-ға төмендеді. Санаторий секторында 28,9 мың адам сауықтыру курсынан өтті, ішкі туризм көрсеткіші 12,6%-ға өсті.
Орталықтың халықаралық қызметі шетелдік медициналық ұйымдармен жеті жаңа меморандумға қол қою есебінен кеңейіп, медициналық туризм 9,5%-ға артты.
Технологиялық жаңғырту аясында 100 жаңа технология енгізілді, оның 15-і елімізде алғаш рет қолданылды. Осы әдістер арқылы шамамен үш мың пациент ем алды. Өндірістік блок екі жаңа радиофармацевтикалық препаратты пайдалануға енгізді.
Цифрландыруға және зияткерлік шешімдерді дамытуға ерекше назар аударылуда. CmtisEdu платформасы тәжірибелік пайдалану кезеңінде және оқу процесін тоқтатпай тестілік оқыту үшін қолданылып, оның үздіксіздігін қамтамасыз етеді.
«AI ассистент: дәрігер, фармацевт, диетолог» және «Зертханалық ассистент жүйесі» жобалары жүзеге асырылуда. Оларды енгізу медициналық мамандарды қолдауға, шешім қабылдауды жеделдетуге, зерттеулердің дәлдігін арттыруға және адами фактордың әсерін төмендетуге бағытталған.
Сондай-ақ, AI-рекрутинг жүйесі енгізілуде. Жоба кадрларды іріктеудің толық циклін автоматтандырып, бос жұмыс орындарын жабу мерзімін қысқартады, қол еңбегінің көлемін азайтады және кадр қабылдау процестерінің ашықтығын арттырады.
Медициналық орталықтың жүйесінде білім беру инфрақұрылымы да жүйелі түрде дамуда. «Қарлығаш» балабақшасы ISO 9001 сапа менеджменті жүйесіне сәйкестігін растады және халықаралық институционалдық аккредитациядан өтті. Шетелдік сарапшылардың қатысуымен өткен халықаралық форумдар, конференциялар мен тағылымдамалар «Қарлығаш» білім беру ортасының халықаралық сараптамалық деңгейде танылуына ықпал етті.
Алқа отырысының қорытындысы бойынша қатысушылар медициналық көмектің қолжетімділігін одан әрі арттыру, құзырет орталықтарын дамыту және озық технологияларды практикалық денсаулық сақтау саласына трансферттеу шараларын талқылады.
