Экологиялық қауіпсіздік қоршаған ортаның сапасына және химиялық ластану деңгейіне тікелей байланысты. Халық денсаулығына айтарлықтай қауіп төндіретін заттардың бірі – тұрақты органикалық ластағыштар тобына жататын диоксиндер. Олар жоғары уыттылығымен, қоршаған ортада ұзақ сақталу қабілетімен және тірі ағзаларда жиналу ерекшелігімен ерекшеленеді.
Диоксиндер көбінесе өнеркәсіптік процестердің жанама өнімі ретінде түзіледі. Атап айтқанда, қалдықтарды жағу, хлорорганикалық қосылыстарды өндіру және металлургиялық операциялар кезінде пайда болуы мүмкін. Бұл заттар топырақта, суда және ауада ұзақ уақыт сақталып, азық-түлік тізбегі арқылы адам ағзасына түседі. Негізгі көздерінің бірі – жануар текті тағам өнімдері, соның ішінде ет, балық, сүт және сүт өнімдері.
Диоксиндер адам ағзасына өте аз мөлшерде түскеннің өзінде уытты әсер етуі мүмкін. Ұзақ уақыт бойы әсер етуі иммундық жүйенің әлсіреуіне, эндокриндік және жүйке жүйелерінің бұзылуына, сондай-ақ гормондық тепе-теңдік пен репродуктивтік функцияға кері ықпал етуі ықтимал.
Осыған байланысты қоршаған орта нысандары мен тағам өнімдеріндегі диоксиндердің деңгейін тұрақты бақылау ерекше маңызға ие. Заманауи зертханалық әдістер бұл қосылыстардың өте аз концентрацияларын анықтауға мүмкіндік береді және қоршаған ортаның химиялық қауіпсіздігін бағалауда маңызды құрал болып табылады.
Санитариялық-эпидемиологиялық сараптама орталығы қоршаған орта объектілерінде және тағам өнімдерінде диоксиндер мен полихлорланған бифенилдердің (ПХБ) құрамын анықтау бойынша зертханалық зерттеулер жүргізеді.
Зерттеулер топырақ, ауа, су үлгілерінде, сондай-ақ жануар текті тағам өнімдерінде, өсімдік майларында, астықта, жемшөп шикізатында және қайта өңделген тағам өнімдерінде орындалады. Бұл зерттеулер қоршаған ортаның ластану деңгейін бағалауға және тағам өнімдерінің қауіпсіздігін қамтамасыз етуге мүмкіндік береді.
