Цифрландырудың қарқынды дамуы және киберқауіптердің өсуі жағдайында ақпараттық қауіпсіздік мәселелері алдыңғы қатарға шығуда. Осыған байланысты «Медициналық технологиялар және ақпараттық жүйелер орталығы» АҚ HR орталығы қызметкерлердің корпоративтік оқытуы мен кәсіби құзыреттерін дамытуға белсенді түрде үлес қосып, ақпаратты қорғау саласындағы мамандарға арналған арнайы оқыту өткізді.
Бағдарлама тек теориялық біліммен шектелмей, оны нақты жұмыс жағдайларында қолдануға бағытталды. Қатысушылар ақпараттық қауіпсіздікті басқару жүйесін (АҚБЖ) құру қағидаттарын, тәуекелдерді талдау тәсілдерін, сондай-ақ халықаралық стандарттардың талаптарын, оның ішінде ISO/IEC 27001 стандартын меңгерді.
Оқыту көпжылдық тәжірибесі бар тәжірибелі сарапшы Бахитжан Сейтмұхамбетовтің қатысуымен өткізілді. Ол ақпараттық қауіпсіздік, АҚБЖ енгізу және халықаралық аудиттерді сүйемелдеу саласында тәжірибесі мол маман, сондай-ақ ұлттық компаниялардың ірі жобаларына және корпоративтік стандарттарды әзірлеуге қатысқан.
Бағдарламада тәуекелге негізделген тәсілге ерекше назар аударылды. Бүгінде дәл осы тәсіл ұйымдарға осал тұстарды уақтылы анықтауға және ықтимал инциденттердің алдын алуға мүмкіндік береді. Оқыту барысында ішкі аудит жүргізу, ақпараттық жүйелерді тексерістерге дайындау және олардың заманауи қауіптерге төзімділігін қамтамасыз ету мәселелері қарастырылды.
Бағдарламаның негізгі бөлігі практикалық жұмысқа арналды. Қатысушылар ақпараттық қауіпсіздік саясатын әзірлеп, активтер тізілімін қалыптастырып, аудит процестерін құрастырды. Бұл олардың алған білімдерін бекітіп, оны нақты жұмыс міндеттеріне бейімдеуге мүмкіндік берді.
Бүгінде ақпараттық қауіпсіздік саласында біліктілікті арттыру – бұл жай ғана оқу емес, ұйымдардың тұрақты жұмыс істеуінің маңызды шарты. Осындай бастамалар қазіргі цифрлық сын-қатерлерге тиімді жауап беруге және ақпараттық жүйелердің сенімді қорғалуын қамтамасыз етуге дайын кәсіби мамандар қауымдастығын қалыптастыруға ықпал етеді.
