Дүниежүзілік денсаулық сақтау ұйымының дерегіне сәйкес, жыл сайын миллиондаған адам тағам мен су арқылы паразиттерді жұқтырады. Шала піскен стейк немесе суши-сет зиянсыз көрінгенімен, олардың ішінде трихинелла, таспа құрттар, токсоплазмоз қоздырғыштары, сондай-ақ описторхоз, клонорхоз және анизакидоз сияқты паразиттер кездесуі мүмкін. Ластанған су мен көкөніс те аскарида, власоглав немесе лямблия тасымалдауы ықтимал.
Бұл – жаһандық деңгейдегі мәселе. Өсіру, тасымалдау немесе дайындау кезінде санитариялық талаптың бір рет бұзылуы жаппай жұқтыруға әкелуі мүмкін. Референс-зертхана мамандарының айтуынша, ең үлкен қауіп аймағында шикі балық пен шала піскен етті ұнататындар, бақылаусыз базардан өнім алатындар және сапасыз су ішетіндер бар.
Мамандар алдын алу үшін көкөніс пен жемісті мұқият жууға, қажет болса дезинфекциялауға, тек қайнатылған не бөтелкедегі суды ішуге, ет пен балықты қауіпсіз температурада пісіруге және тағамды дұрыс сақтауға кеңес береді.
Референс-зертханада күн сайын тағам мен судан паразитарлық ауру қоздырғыштарын анықтау үшін зерттеулер жүргізіледі. Асүйдегі ұқыптылық пен дұрыс термиялық өңдеу – отбасы денсаулығын қорғайтын сенімді қалқан.
